Tuesday, April 28, 2020

Written on

මීටරේ කඩන පුද්ගලයිනුත් අද සිට අත්අඩංගුවට


කොළඹ, ගම්පහ, කළුතර සහ පුත්තලම යන දිස්ති‍්‍රක්ක හැර සෙසු දිස්ති‍්‍රක්කවල ඇදිරි නීතිය අද (28) අළුයම 5.00 ට ඉවත් කෙරුණා. ඇදිරි නීතිය යළි පැනවෙන්නේ රාතී‍්‍ර 8.00 ටයි.

අද සිට මැයි පළමු වැනිදා දක්වා මෙම දිස්ති‍්‍රක්කවල ඇදිරි නීතිය කි‍්‍රයාත්මක වන්නේ රාති‍්‍ර 8.00 සිට පසුදා අලූයම 5.00 දක්වා පමණක් බවයි පොලීසිය සඳහන් කළේ.

සෞඛ්‍ය මෙන්ම ආරක්‍ෂක අංශ ද ජනතාවගෙන් ඉල්ලා සිටින්නේ අත්‍යවශ්‍ය ආහාර ද්‍රව්‍ය හා ඖෂධ ඇතුළු භාණ්ඩ මිලදී ගැනීමට හැර වෙනත් කටයුතු සඳහා නිවසින් බැහැර නොයන ලෙසයි. එවැනි භාණ්ඩ මිලදී ගැනීමට තම ප‍්‍රදේශයේ පිහිටි පා ගමනින් යා හැකි ආසන්නතම වෙළද සැල පමණක් තෝරාගත යුතු බවට ආණ්ඩුව මීට පෙර දැනුම් දුන්නා.

පොලිස් නීති දිසාව භාර නියෝජ්‍ය පොලිස්පති අජිත් රෝහණ කියාසිටියේ ඇදිරි නීතිය ඉවත් කිරීමත් සමග සේවා ස්ථාන, කාර්යාල, වෙළදසැල්, කර්මාන්ත ශාලා, විවෘත කිරීමට අවස්ථාව පවතින බවයි. එහෙත් ඒ සෑම අවස්ථාවකදීම සෞඛ්‍ය බලධාරීන් ලබාදී ඇති උපදෙස් අනිවාර්යයෙන්ම පිළිපැදිය යුතු බවද මෙහිදී අවධාරණය කෙරුණා.
ඇදිරි නීතිය උල්ලංඝණය කරන පුද්ගලයින් මෙන්ම සෞඛ්‍ය රීති කඩ කරන පුද්ගලයින්ද අද (28) සිට අත්අඩංගුවට ගැනීමට කටයුතු කරන බව නියෝජ්‍ය පොලිස්පතිවරයා සදහන් කළා.

එහිදී "පොලිසිය සිවින් ඇඳුමින් නිලධාරීන් යොදවලා තියෙනවා.  සමාජ දුරස්ථභාවය පවත්වාගෙන යන්නේ නැත්නම් කණ්ඩායම් වශයෙන් පොදු ස්ථානවල හෝ පෞද්ගලික ස්ථානවල ගැවසෙන්නේ නම් ඒ අයවත් අත්අඩංගුවට ගන්න පොලිසිය කටයුතු කරනවා." යනුවෙන් ද සඳහන් කෙරුණා.

ඇදිරි නීතිය ඉවත් කළද උත්සව, වන්දනා, විනෝද චාරිකා, සැණකෙලි, පෙරහැර හා රැස්වීම් ආදිය සංවිධානය කිරීම තහනම් බවයි මෙහිදී අවධාරණය කෙරුණේ.

ජාතික හැදුනුම්පතේ අවසන් අංකය මත නිවසින් බැහැරට යාමට අවස්ථාව ලබාදීමේ ක‍්‍රමවේදය අද සිට කි‍්‍රයාත්මක වනවා. ආණ්ඩුව මීට පෙර දැනුම් දුන් ආකාරයට අනුව අද දිනයේ නිවසින් බැහැරට යාමට අවස්ථාව හිමිවන්නේ හැදුනුම්පතේ අවසන් අංකය ලෙස 3 හෝ 4 සදහන් පුද්ගලයින්ට පමණයි.

කිසියම් කරුණකට නිවසින් බැහැරට යන්නේ නම් විෂබීජහරණය, මුඛ ආවරණ පැළදීම, විටින් විට අත් සේදීම හා සමාජ දුරස්ථභාවය ආරක්‍ෂා  කර ගන්නා ලෙසටයි සෞඛ්‍ය අංශ ජනතාවට දැනුම් දෙන්නේ.


More News